Ўзбекистон Янгиликлар ўзбек тилида
Ўзбекистон президенти Шавкат Мирзиёев Фарғона вилояти ҳокими Шуҳрат Ғаниевнинг кўчмас мулкларни оммавий бузишда йўл қўйган хатолари учун танқид қилди. Аввалроқ Хоразм вилояти ҳокими Фарҳод Эрмановнинг худди шу сабаб билан танқид қилингани ҳақида хабар берган эдик.
Давлат раҳбари ҳокимларни 2 август куни кичик бизнес ва тадбиркорликни ривожлантириш ҳамда бутун республикада кўчмас мулкларнинг бузилишига бағишланган видеоселектор йиғилишида танқид қилди.
«Газета.uz» бутун дунёга ўз кулолчилик мактаби билан машҳур Риштон шаҳрида кенг миқёсли реконструкция ишлари доирасида уйларнинг оммавий бузилиб, дарахтларга қирон келтирилаётгани ҳақида ёзган эди (рус тилида). Ушбу ишларга турли ташкилотлар ходимларининг жалб қилингани эса Меҳнат вазирлиги томонидан ноқонуний деб топилди.
««Мана, интернет фойдаланувчиларининг Риштон туманидаги кўчмас мулк бузилишларига нисбатан изоҳлари. Мен сизларга тайёр пул бераяпман, пулни «Обод қишлоқ» қилинглар, деб бераяпман. Мана, сенинг менга «дўстлигинг», Ғаниев деган валломат! Мана, одамлар изоҳларда йиғлаяпти, сенинг расминг йўқ, президентнинг расми бор. Сен ноинсоф бориб, Эрмановга ўхшаб аҳмоқларча «буза, буз» дейсан. Бузишдан аввал сен ўз бошингни буз», — дея тавсия қилди президент.
Унинг сўзларига кўра, кўпчилик аҳоли ҳокимларнинг хатти-ҳаракатларини президент сиёсати сифатида қабул қилмоқда. Шавкат Мирзиёев Зафар Рўзиев ва Шуҳрат Ғаниевнинг савиясига шубҳа билдирди.
«Болалар меҳнати бор эди, энди у йўқ бўлди, энди бутун интернет президент топшириқ берган, бузиш, одамларни норизо қилиш билан тўлиб тошди. Эй ноинсоф, Риштон бўйича ҳам сенга пул бериб айтдимки, Риштонни янгилаш керак, бироқ одамларни рози қилиб қилиш керак, деб. Жаноб Ғаниев, тажрибали ҳоким! Майли, Эрманов кеча келган ҳоким, Рўзиев иккаланг хиёнатчисан! Сизлар билан катта-катта ишларни амалга ошира оламизми? Ҳеч қачон ошира олмаймиз! Чунки сизларга бир топшириқ беришга одам қўрқади! Нега десангиз, савиянг йўқ, билиминг йўқ, китоб ҳам ўқимайсан, президентнинг қарорини ҳам», — деди давлат раҳбари.
Президент ўз топшириғи билан бош вазир Абдулла Арипов бир ҳафта ичида тўртта сектор фаолиятига оид янги президент қарорини тайёрлашини маълум қилди. Жойлардаги ишларни ташкил этишнинг мазкур тизими 2017 йил августидан буён амалга жорий этилмоқда.
«Тўртта сектор ишламаяпти. Иккинчидан, масъулият ва жавобгарликни ҳис қилиш йўқ. Учинчидан, мен [президентлигимнинг] биринчи кунидан такрорлаб келмоқдаман: одамларни бугун рози қилайлик, деб. Сизлар рози қилиш уёқда турсин, қилган ишинг одамларда норозилик уйғотиш бўлмоқда», — деди у.
31 июль куни Риштон тумани ҳокими Таваккалжон Раҳимов лавозимини тарк этди. Фарғона вилояти ҳокимлиги буни амалдорнинг саломатлиги билан боғлиқ эканини маълум қилди.
