Qimmatbaho kuylak

Bir ayol Abu Hanifa –rahimahulloh-ning huzurlariga ipak matodan tikilgan ko’ylakni sotgani olib keldi.

Abu Hanifa u ayolga: Ko’ylakning narkhi qancha? – deb so’radilar.

Ayol yuz dirham, yuz kumush tangaga sotmoqchi ekanini aytdi.

• E, yo’q, bu ko’ylak yuz dirham emas, qimmatroq turadi, – dedi Abu Hanifa.

U ayol sotib oladigan narsasining bahosini tushurish o’rniga ko’tarayotgan bu kharidordan ajablanib, ko’ylakning bahosini ko’tarib:

• Unday bo’lsa, to’rt yuz dirhamga ola qoling, – dedi.
• Ko’ylakning bahosi bundan ham ko’p, – dedi Abu Hanifa.
• Siz mening ustimdan kulyapsizmi?! – deb ayolning achchig’i chiqdi.
• Mening so’zimga ishonmayotgan ko’rinasiz. O’zingiz ishonadigan biron tajribali kishi olib keling, ko’ylakni qanchaga baho qilar ekan.

Bir ozdan so’ng u ayol bir kishini boshlab keldi.

Ko’ylakni yakhshilab ko’rgach, u kishi: buning bahosi besh yuz dirham, – dedi.

Abu Hanifa uni shu bahoga sotib oldilar. U ayol ham yuz dirham o’rniga besh yuz dirham olganiga khursand bo’lib, Abu Hanifaning amonatdor va rostgo’yligiga rahmat aytib ketdi.